Maangmuhna 21

 

Van Thak leh Lei Thak

1Tua ciangin van thak khat leh lei thak khat ka mu hi. Van masa leh lei masa maimang khin a, tuipi zong om nawnlo hi. * 2Mothak khat a pasal tawh a kituah dingin a kizem bangin vantung Pasian kiang panin Khuapi Siangtho ahi Jerusalem khua thak a hong paisuk ka mu hi. * 3Tokhom panin nakpi takin awging khat ka za a, “Tu-in Pasian omna inn pen mite tawh omkhawm ta hi. Pasian in amaute ompih ding a, amaute pen ama mite hi ding uh hi. Pasian mahmah amaute tawh omkhawm ding a, amah pen amaute' Pasian hi ding hi. * 4Amaute' mit panin khitui khempeuh nulsak ding hi. Thu luisate maimang khinta ahih manin sihna, dahna, leh na sa-a kahna cihte om nawnlo ding hi,” a ci hi. *

5Tua ciangin tokhom tungah a tupa in, “Tu-in na khempeuh a thakin ka bawl hi,” ci hi. Tua ciangin, “Hih thute thumanin muan'taak ahih manin lai-ah gelh in,” hong ci lai hi. 6Tua ciangin amah in, “Tu-in man khinta! Kei pen a kipatna leh a tawpna a cihna Alfa leh Omega ka hi hi. A dangtak mi khempeuh tungah nuntakna tuinak panin a khongin tui ka pia ding hi. * 7A gualzo mi khempeuh in kei tung panin a ngahding thu in: Kei pen amaute' Pasian ka hi ding a, amaute keima ta ahi ding uh hi. * 8Ahi zongin a meidawite, a lehtatte, a lampialte, mi thatte, a paktatte, aisante, milim biate, leh zuaugente omna ding mun pen sihna nihna ahi kat a kikhulna meiphualpi kuang sung ahi hi,” a ci hi.

Jerusalem Khua Thak

9Tua ciangin gimna nunung sagihte a dimin a om hai sagih a tawi vantung mi sagihte sung panin khat kei kiangah hong pai-in thu hong gen a, “Hong pai in; Tuuno zi, a Mothak ka hong lak ding hi,” hong ci hi. 10Tua laitakin Kha Siangtho tawh ka kidim a, tua vantung mi in mual sang mahmah khat dawnah hong paipih hi. Vantung Pasian kiang panin a hong paisuk Khuapi Siangtho ahi Jerusalem khua a hong lak hi. * 11Tua khuapi pen Pasian' vang tawh te ziazua a, Jasper suangmanpha bangin taang a, Kristal suangmanpha bangin siang kilkel hi. 12A kulh sahin sang mahmah a, kulhkongpi sawmlenih nei-in, a kongpite-ah vantung mi sawmlenih om a, a kulhkongpite tungah Israel minam sawmlenihte' min kigelh hi. 13Nisuahna lamah kongpi thum, leilu lamah thum, leitaw lamah thum, nitumna lamah thum mah om hi. * 14Tua khuapikulh pen kulh tawphah suang sawmlenih tungah a kiciang hi a, tua suangtawphahte tungah Tuuno sawltak sawmlenihte' min kigelh hi.

15Keima kiangah thu a hong gen vantung mi in tua khuapi, a kulhkongpite leh a kulh a tehna dingin kham kibawl tehna ciang khat a nei hi. * 16Tua khuapi a pang kikim linlian a, a dung a vai a kikim ahi hi. A ciang tawh khuapi a teh ciangin tai tul leh za nga bang pha a, a dung, a vai, leh a san'na kikim hi. 17A kulhpi zong ama zat tehna tawh a teh ciangin pi za nih sawm khat guk a sang hi. 18A kulhpi dingin jasper suangmanpha kiciang a, a khuasung pen kham citak tawh a kibawl hi a, limlang bangin siang kilkel hi. 19Tua khuapi kulh suangtawphahte pen suangmanpha namkim tawh kizem hi. A masa-in jasper suangmanpha, a nihna-ah sapfira suangmanpha, a thumna-ah agate suangmanpha, a lina-ah emerald suangmanpha, 20a ngana-ah onik suangmanpha, a gukna-ah karnelian suangmanpha, a sagihna-ah khrisolait suangmanpha, a giatna-ah beryl suangmanpha, a kuana-ah topaz suangmanpha, a sawmna-ah khrisoprase suangmanpha, a sawmlekhatna-ah jakinth suangmanpha, a sawmlenihna-ah amethyst suangmanpha tawh a kizem hi. 21A kongpi sawmlenihte kep sawmlenih tawh a kibawl hi a, kongpi khat ciangin kep sabit khat ahi hi. A khuapi sung lampite kham citak vive hi a, limlang bangin a sung kimu paisuak thei hi. *

22A Vanglian Topa Pasian leh Tuuno pen khuapi biakinn hita ahih manin tua khuasungah biakinn dang ka mu kei hi. 23Pasian' minthan'na vang pen khuavak hi a, Tuuno zong meivak hi khin ahih manin tua khuapi in nitaang leh khataang cihte kisamlo hi. * 24Tua a taang sungah leitung mite lam pai ding uh a, leitung kumpite in a neihsa khempeuh uh hong paipih ding uh hi. * 25Zan khuamial hun cih omlo ding ahih manin kulhkongpite khak hun cih omloin a tawntungin kihong paisuak ding hi. 26Leitung mite' hauhna leh liatnateng tua khuapisung hong kitun'pih ding hi. * 27Ahi zongin a sianglo, a hoihloin a gamta mi, zuau a gen mite kuamah lut theilo ding uh a, a nungta mite a kigelhna Tuuno laibu sungah a min a omte bek tua khuapi sungah lutthei ding uh hi. *