Kumpi Nihnate 23

 

Josiah’ Puahphatte

Josiah’ Puahphatte (2Khang 34:3-7,29-33) 1Tua ciangin kumpipa in Judah le Jerusalem upate khempeuh samsak a, ama kiangah hong kikhawm uh hi. 2Tua ciangin Topa’ biakinn-ah kumpipa paito a, amah tawh Judah mi khempeuh, Jerusalem-a tengte khempeuh, siampite, kamsangte, le mi khempeuh a neu a lian tawh pai uh hi. Tua ciangin amah in amaute’ zakin Topa’ biakinn sungah a kimu thuciamna laibu sunga thute khempeuh a sim hi. 3Tua ciangin khuampi gei-ah kumpipa dingin hih laibu sunga a kigelh thuciamna kammalte khempeuh a sepna ding, Topa’ thu mangin a thupiaknate le a thukhamte, a lungsim le a ngaihsutna khempeuh tawh a zuihna ding, Topa’ mai-ah thuciamna khat a bawl hi. Tua ciangin mi khempeuh zong tua thuciamna-ah a kihel uh hi. 4Tua ciangin kumpipa in siampi lianpen pa Hilkiah, le a nihna siampi, le kongcingte in Topa’ biakinn sung panin Baal le Asherah nusian milim a dingin a kibawl nazatte khempeuh, le vantung a om nate khempeuh biak nadingin a kibawlte hong paikhiatpih nading uh thu a pia hi. Amah in Jerusalem pualam Kidron leikang halna munah tuate halin a vute Bethel khua-ah a pua hi. 5Tua ciangin amah in Judah khuapite le Jerusalem kiima om mualtung a biaknate tungah paknamtui hal dingin Judah kumpite in a kipsaksa milim biate’ siampite a hawlkhia hi. Baal tung, ni tung, kha tung, aksi honpite tung, le vantung a om nate khempeuh tungah paknamtui a halte zong a hawlkhia hi. 6Tua ciangin amah in Topa’ biakinn panin Jerusalem pualam, Kidron lui-ah Asherah nusian milim paikhiatpihin hal a, tua ciangin amah in satvui-in mi nautangte’ han tungah a vuite lawn hi. 7Tua ciangin amah in numeite in Asherah milim a dingin a kizang puante a gatna mun Topa’ biakinn sunga om a paktat pawlte’ innte a phelkhia hi. 8Tua ciangin amah in Judah khuapite panin siampite khempeuh paikhiatpih a, Geba panin Beersheba ciang dong, siampite in paknamtui a halna mualtung a biaknate a susia hi. Tua ciangin amah in khuapi kulhkongpi veilam, khuapi ukpa Joshua’ kongpi lutna-ah a om dawibiakna munte a phelkhia hi. 9Tua lai-a sem siampite ahihleh Jerusalem-a Topa’ biakna tau-ah hong paito thei lo uh a, ahi zongin amau’ sanggamte’ lakah silngo sawh loh anlum ne thei uh hi.

10Tua ciangin kuamah in Molek pasian tungah a tanu ahi a, a tapa ahi zongin biakna-in a hal theih nawn loh nadingin Hinnom Kuam sunga om Tofeth kici milim biakna mun a susia hi. 11Tua ciangin amah in a kiimnai-a om, innsung ulian Nathanmelek’ inn gei, Topa’ biakinn sung lutna munah, Judah kumpite in ni tungah a ap uh a sakolte hemkhia hi. Tua ciangin amah in ni’ sakol leengte mei tawh a hal hi. 12Tua ciangin Judah kumpite in a bawlsa, Ahaz’ inndei tungnung khumzanga a om biakna taute, le Topa’ biakinn tual nihte sungah Manasseh in a bawlsa biakna taute, amah in phelin satnen a, tua a vuite Kidron lui-ah a paai hi. 13Tua ciangin Kumpi Solomon in Sidon mite’ kihhuaina Ashtoreth pasian a’ ding, le Moab-te’ kihhuaina Khemosh pasian a’ ding, le Ammon mite’ kihhuaina Milkom pasian a dingin a lam, Jerusalem nisuahna lam, Oliv Mual leitaw lama om mualtung a biaknate kumpipa in a susia hi. 14Tua ciangin amah in a biakna songte satkhamin, Asherah milimte phuk a, mihing guh tawh a dim tua munte a vuk hi. 15Tua tham loin Israel-te a khialsak Nebat’ tapa Jeroboam in Bethel-ah a phuhsa mualtung a biakna, tua biakna mun a biakna tau tawh, amah in phelin a suangte sukham a, tuate a satvui hi. Amah in Asherah milim zong a hal hi.

16Tua ciangin Josiah kihei-in khuadak a, mualtung a om hante a mu hi. Amah in mi sawlin hante sung panin a guhte lasak a, hih thute a genkhol Pasian’ mipa in a gen Topa’ thugen tawh kizui-in biakna tau tungah tuate halin a susia hi. 17Tua ciangin amah in, “Hua galkhat a ka muh phawkna mual bang ahi hiam?” a ci hi. Tua ciangin khuapisung mite in ama kiangah, “Judah panin hong pai-in Bethel-a biakna tau tungah na bawl hih thute a genkhol Pasian’ mipa’ han ahi hi,” ci-in a gen uh hi. 18Tua ciangin amah in, “Amah tuaci omsak un; kuamah in ama guhte khin kei un,” a ci hi. Tua ahih ciangin amaute in Samaria panin hong paikhia kamsangte’ guhte le ama guhte tuaci omsak uh hi. 19Tua ciangin Israel kumpite in a bawlsa, Topa a hehsakna uh, Samaria khuapite sunga om mualtung a biakna munte khempeuh zong Josiah in a lakhia hi. Bethel-a a hihsa khempeuh mah bangin tuate tungah a hih hi. 20Tua ciangin amah in tua lai-a a om, mualtung a biakna siampite khempeuh, biakna taute tungah that a, tuate tungah mihing guh a hal hi. Tua ciangin Jerusalem-ah amah a ciahkik hi.

Josiah in Paisan Pawi Bawl

(2Khang 35:1-19) 21Tua ciangin kumpipa in mi khempeuh thu pia a, “Hih thuciamna laibu sungah a kigelh mah bangin Topa na Pasian uh pahtawina-in Paisan Pawi bawl un,” a ci hi. 22Bang hang hiam cih leh Israel-te thu a khen thukhente’ hun a kipan hitaleh, Israel kumpite ahih kei leh Judah kumpite’ hun sung khempeuh tua bang Paisan Pawi kibawl ngei lo hi. 23Ahih hangin Kumpi Josiah’ uk kum sawm le giatna kumin Jerusalem-ah Topa a dingin Paisan Pawi kibawl hi.

Judah tungahTopa’Heh Nilohna

24Tua tham loin Topa’ biakinn sungah siampi Hilkiah in a muh laibu sungah a kigelh thukham kammalte amah in a kipsak theih nadingin Judah gam sung le Jerusalem-a om vankahte, aisante, innsung pasian-te, milimte, le a kihhuai nate khempeuh Josiah in a hemkhia hi. 25Ama hun ma-in, amah tawh a kibang, Moses thukham tawh kizui-in a lungsim khempeuh, a nuntakna khempeuh, le a thahatna khempeuh tawh Topa’ lamah a kihei kumpi om lo a, ama nungah zong amah tawh a kibang khat zong hong khang nawn lo hi. 26Manasseh in amah a phinnate khempeuh hangin Judah tungah ama hehna, a lauhuai hih hehna lian panin Topa kihei nai lo hi. 27Topa in, “Israel ka khinkhiat bangin ka muhna panin Judah zong ka khinkhia ding a, keimah in ka teelsa khuapi Jerusalem, le ka min om ding hi, ka cihna biakinn ka paaikhia ding hi,” a ci hi.

Josiah’ Sihna

(2Khang 35:20-27) 28Tu-in Josiah’ gamtatna a omlaite, le a hih khempeuh, Judah Kumpite’ Khang Tangthu Laibu sungah kigelh hi. 29Ama hun sungin Assiria kumpipa a huh dingin Eufratis gun-ah Egypt kumpipa Faro Neko kuanto hi. Amah a khaktan dingin Kumpi Josiah zong a kuan hi. Faro Neko in Josiah a muh ciangin Megiddo ah a that hi. 30Tua ciangin ama nasemte in Megiddo panin a sisa-in leeng khat sungah amah pua-in Jerusalem-ah ciahpih uh a, a hanah amah a vui uh hi. Tua ciangin tua gam mite in Josiah’ tapa Jehoahaz la-in sathau nilh uh a, a pa’ tangin kumpi-in a koih uh hi.

Judah Kumpi Jehoahaz’ Ukna le A Zakiatna

(2Khang 36:1-4) 31Jehoahaz in uk ding a kipatin kum sawmnih le thum pha a, amah in Jerusalem-ah kha thum sung uk hi. Ama nu’ min Hamutal hi a, Libnah khua mi Jeremiah’ tanu ahi hi. 32A pu a pate’ gamtatnasa khempeuh bangin Topa’ muhna-ah amah a sia gamta hi. 33Tua ciangin amah in Jerusalem a uk theih loh nadingin Faro Neko in Hamath gam sung Riblah khua-ah amah kol bulh a, Judah mite tung panin ngun talen zakhat le kham talen khat siah a kai hi. 34Tua ciangin Faro Neko in a pa Josiah’ tangin Josiah’ tapa Eliakim kumpi-in koih a, ama min Jehoiakim ci-in a kheelsak hi. Ahih hangin amah in Jehoahaz paikhiatpih hi; amah Egypt tung a, tua lai-ah a si hi. 35Tua ciangin Jehoiakim in a ngun le a kham Faro’ tungah pia a, ahih hangin Faro’ thupiakna bangin tua sum a piak dingin a gam sung mite tung pan amah in siah a dong hi. Faro Neko tungah a piak dingin, amah in mi khempeuh tung panin a neihsa uh tawh kizui-in a gam sung mite’ ngun le kham a dok hi.

Judah Kumpi Jehoiakim’ Ukna

(2Khang 36:5-8) 36Jehoiakim in uk ding a kipatin kum sawmnih le nga pha a, amah in Jerusalem-ah kum sawm le khat sung uk hi. Ama nu’ min Zebidah hi a, Rumah khuami Pedaiah’ tanu ahi hi. 37A pu a pate’ gamtatnasa khempeuh bangin Topa’ muhna-ah amah a sia gamta hi.