Thupatna

Jew mi a hilote lakah Jesuh hangin lungdamna thu kihilhin, tua thu zuihding hong kipat uh ciangin, Khristian kician taktak hihna dingin Moses Thukhamte zuihding kisam hiam, kisamlo hiam, cihna thu hong piang hi. Paul in, Moses Thukhamte zuihding kisamlo hi. Khrih sungah nuntakna thubul man pen upna bek hi a, tua upna hangin mi khempeuh, Pasian tawh kipawlkik thei hi, ci-in gen hi. Ahi zongin Rom kumpite ukna Asia Minor gamsunga a om Galati gamneu sunga pawlpi tuamtuamte kiangah Paul a langpang mi pawlkhat hong pai uh a, Pasian tawh kipawl theihna dingin Moses Thukhamte zong zuihding kul hi, ci-in a gen uh hi.

Hih bang thuhilhna manlote in lam a khialhsak mite, upna man leh zuihna man-ah a kiheikik theihna dingin Galati Gama Om Khristiante tungah Paul' Laikhak a kigelh ahi hi. Paul in Jesuh Khrih sawltak man taktak ahihna thu a genna tawh a thugen na pan hi. Sawltak nasep a sem dingin mihingte' seh hiloin, Pasian in a sap ahihna thu leh ama nasepna pen Jew mi a hilo mite lakah a sem ding ahihna thu a limgen hi. Tua ciangin a thugen zomlai a, Pasian leh mite a kipawl khawmkik theihna pen upna hang bek ahihna thu a gen hi. Tua banah Khrih upna a kineih ciangin itna lungsim hong piang ahih manin Khristian gamtat hoihte pen tua itna hangin ama thu-in a hong piangtawm ahihna thu, Paul in a genna tawh a thu na khum hi.

Tom Lakna
Thupatna    1:1-10
Paul, sawltak ahihna hangin aana a neihna    1:11—2:21
Pasian' hehpihna hangin lungdamna thu    3:1—4:31
Khristiante' suahtakna leh a tavuan    5:1—6:10
Thukhupna    6:11-18

Galati 1

 

Hopihna

1Mihingte' hong sehna leh hong sawlna tawh sawltak na a sem hiloin, Jesuh Khrih leh sihna panin tua Jesuh a thosakkik Pasian' hong sawlna tawh sawltak na a sem keimah Paul in Galati gama om pawlpi tuamtuamte tungah lai ka hong khak hi. 2Kei tawh a omkhawm i Khristianpihte in zong note hong hopih uh hi.

3Eite' Pa Pasian leh Topa Jesuh Khrih in note khempeuh tungah dikna leh nopsakna thupha hong tungsak ta hen. 4A siahuai tuhun sung panin eite a hong suahtaksakna dingin eite' Pa Pasian' deihna tawh kizui-in i mawhna hangin tua Jesuh Khrih amahmah a hong kipiatawm ahi hi. 5Pasian' min thang tawntung ta hen! Amen.

Lungdamna Thu Adang Omlo

6A hong hehpihna tawh Khrih hangin note a hong sam Pasian nusiakik pakin lungdamna thudang khat na sang malam na hih manun lamdang ka sa mahmah hi. 7A taktakin ci lehang lungdamna thu adang a om hilo a, mi pawlkhatte in note' lungsim hong toknawi-in, Khrih hanga lungdamna thu hei-in thudang tawh laihnuam uh ahih manin, tua amau' deih thu pen lungdamna thu a cihsak mawkmawk ka hi hi. 8Note tungah ka hong hilhsa uh lungdamna thu tawh a kilehngatin, kote-a kipan vantung mi dongin thudang a hong hilh a om leh tua a hong hilh mipa hell khuk sungah tung ta hen! 9Ka hong gen ngeisa mah bangin ka hong gen kikin-ah: Note' san'sa lungdamna thu tawh a kilehngatin thudang a hong hilh mi peuhpeuh hell khuksung tung ta hen! 10Hih bangin thu ka gen ciangin mite' hong pahtak theihna ding a zong tawh kibang na hong sa uh hiam? Mite' pahtak ding a ut ka hi kei a, Pasian' hong pahtak ding a hanciam ka hi hi. Mihingte' hong pahtak theihna dingin a gamta hi zenzen leng, Khrih' nasem ka hi kei ding hi.

Paul, Sawltak A Suahna

11Sanggamte aw, keima hilh lungdamna thu pen mihingte tung panin a hong kipan ahihlohna thu na theihding uh ka deih hi. 12Mi khatpeuh tung panin ka ngah hilo a, mi khatpeuh in hong hilh zong hilo hi. Jesuh Khrih in kei tungah a hong lahna hang bekin hih thu a thei ka hi hi. 13Jew biakna sungah ka omlai hunin Pasian' pawlpi tuamtuamte bawlsiat ding kin mahmahin, a beimangna ding uh ka hanciamna, * 14leh ka khan'gualte lakah Jew biakna lamah a makai pen ka hihna thu, leh ka pu ka pate uh tang ngeinate a nakkin mahmah ka hihna-a kipanin ka pianzia ngeisate khempeuh na zaksa na theihsa uh ahi hi. * 15-16Ahi zongin Pasian in a hong hehpihna tawh ka suahma pekin kei hong teelin ama na a sem dingin hong sam khin hi. Keimah in ama Tapa hanga lungdamna thu, Gentail mite lakah ka hilhtheihna dingin kei tungah a Tapa hong kilatsak hun laitakin kuama kiangah thudongin ka pai kei a, * 17keima hun ma-in sawltak na a sem khinsa mite tawh a kimu dingin zong Jerusalem khua-ah ka pai tuan kei hi. Arabia gamah ka paizaw a, tua lai panin Damaskas khua-ah ka kileh hi.

18Tuazawh kum thum khit ciangin Peter kiangah a hawh dingin Jerusalem khua-ah ka pai a, ama kiangah kha lang sung ka taam hi. * 19Tua hun laitakin Topa' sanggam James simloh sawltak kuamah dang ka mu kei hi. 20Hih ka thugente a man vive hi a, zuau gen hetlo ka hih lamtak Pasian in hong thei hi. 21Tua lai panin Syria leh Silisia gamah ka pai hi. 22Tua hun ciangdong Judea gama om Khrih pawlpi tuamtuamte in ka meelin hong thei nailo uh a, 23“Ei a hong bawlsia ngei mipa in a maiman'sak nop Khrih upna thu mah a hilhhilh hi,” ci-in a kigenna thu a zak bek uh ahi hi. 24Tua hi a, keima tunga thupiang hangin amaute in Pasian' min a phat uh hi.