Thupatna

Filippi khua Khristian-te tungah Paul' Laikhak in Europe gamsung panin Rom kumpite ukna sungah a om Masedonia gamah Paul in a phuh masak pawlpite tungah a gelh ahi hi. Hih lai pen thong sungah Paul a om laitak, Khristian nasem dangte in amah langbawlin a lungkham laitak, leh Filippi khua-a pawlpi sungah thuhilhna manlo a om manin a lungkham laitakin a gelh ahi hi. Ahi zongin hih laikhakna sungah Paul in Jesuh Khrih a up mahmahna hang bekin a kithei lungdamna leh muan'na a neihna thu a om hi.

Hih laikhak a gelhna a hang masa pen, amah a kisap hun laitakin Filippi Khristian-te in huhna a puaknate hangin a lungdamna thu a zaksak nopna ahi hi. Amah in hih zahin lungkhamna thuak a, amaute in zong a thuak ahi ta zongin lungsim han'na a neihtheihna dingun hih lai a khakna sungah zong a limgen hi. Amaute in huaihamna leh kiphatsakna lungsim neiloin, Jesuh bangin kiniamkhiatna lungsim a neihzawkna dingun a thum hi. Amaute Khrih tawh kipawlin a nuntakna uh pen, upna hangin a ngah uh Pasian' hang hi a, Jew Thukhamte a zuihna hang uh ahih lohna a phawksak hi. Khrih tawh kipawlin a nungta mite tungah Pasian in a piak lungdamna leh nopsakna thu zong a gen hi.

Hih laikhak sungah Khristian upna leh nuntakna-ah lungdamna, lungmuan'na, pumkhat hihna, leh kip paisuakna ding thu a limgen hi. Paul in Filippi khua-a om pawlpite a it mahmahna thu zong a kilangsak hi.

Tom Lakna
Thupatna    1:1-11
Paul' omzia    1:12-26
Khrih hangin nuntakna    1:27—2:18
Timoti leh Epafroditas a sawl nopna    2:19-30
Galte leh lauhuaina a omte hilhkholhna    3:1—4:9
Paul leh Filippi lawmte    4:10-20
Thukhupna    4:21-23

Filippi 1

 

Hopihna

1Jesuh Khrih' sila keimah Paul leh Timoti in

Filippi khua-a om Khrih tawh a kipawl Pasian' mite, siate, leh upate khempeuh tungah lai ka hong khak uh hi. *

2I Pa Pasian leh Topa Jesuh Khrih in note tungah dikna leh nopsakna thupha hong pia ta hen.

Filippi Khristiante-a' ding Paul' Thungetna

3Note ka hong phawk simin ka biak Pasian tungah ka lungdamna ka ko hi. 4-5Note in lungdamna thu na zak ni uha kipanin tuni ciangdong, lungdamna thuhilh nasepna-ah kei na hong huhna uh hangin ka nuam mahmah a, note-a' dingin thu ka nget simin lungdam mahmahna tawh ka ngen tawntung hi. 6Note sungah hih nasep hoih a hong pankhia Pasian in Jesuh Khrih hong paikik hun ciangdong, mi cingtaak na hihna dingun hong huh ding hi, ci-in teltakin ka thei hi. 7Lungdamna thu hangin ka thongkiatna leh lungdamna thu man hi, ci-in pangin ka kipsakna ding hun ka ngahna-ah kei tawh a hong pangkhawm na hih manun ka lungsim sungah note na om tawntung uh a, hih zahta-in note ka hong phawkding a kilawm thu mah ahi hi. 8Jesuh Khrih lungsimzah mahin note ka hong it taktakna thu Pasian in a hong thei hi. 9Note-a' ding deihsakna tawh thu ka hong ngetsak thu in: Note' lungsimah itna khang semsemin, a sia leh a pha a mantakin khenthei-in a hoihpen na teeltheihna ding uh ahi hi. 10Tua hi leh Khrih hong paikik ni ciangin paubaan'na omloin a siangtho na hi ding uh hi. 11Jesuh Khrih in note mihoih a hong suahsak theihna leh mite in Pasian pahtawi-in a phattheihna thu, note' gamtat hoih in midangte tungah kilangsak ding hi.

Khrih-a' ding Nuntakna

12Sanggamte aw, kei tungah a piang thu in lungdamna thu mai a nawtsakzaw ahihna thu na theihding uh ka deih hi. 13Bang hang hiam cih leh Khrih nasem ka hihna hangin thongkia ka hihna thu, inncing galkapte-a kipanin mi khempeuh in a thei uh hi. * 14Tua banah keima thongkiatna hangin hih lai-a om Khristiante a tamzaw in Topa muan'na-in nei uh a, lau hetloin Pasian' thu gen ngamna-in neizaw uh hi.

15Mi pawlkhatte in ahih leh hong hazatna leh hong langpan' nopna tawh Khrih thu hilh uh a, ahi zongin mi pawlkhatte in lungsim hoihtak mah tawh a hilh uh hi. 16Hih bang mite in, Pasian' hong sawlna tawh lungdamna thu ka hutna hangin thongkia ka hihna thu thei-in, itna lungsim tawh Pasian' thu a hilh uh hi. 17Pawlkhatte in ahih leh lungsim hoih tawh hiloin ka thongkiatna-ah na ka sak semsem theihna dingin kei hong demna-in Khrih thu a hilh uh hi. 18Ahi zongin phamawh ka sa kei hi. Lungsim hoih tawh a kihilh a, lungsimkhem tawh a kihilh ahi zongin, bangbang hita se leh Khrih' thu gen uh ahih nungsang, kei ka lungdam hi.

19Note hong thungetsakna leh Jesuh Khrih Kha Siangtho huhna tawh suakta ding hi ing, ci-in thei ka hih manin ka lungdam hi. 20Ka si a, ka hing zongin, a diak diakin tu-a kipanin a tawntungin midangte in Khrih phat theihna ding lungsim han'na a neih theihna dingun ka lungsim leh ka pumpi tawh keima tavuan ka lelh hetlohna ding pen ka deihdeih, ka lametet bulpi ahi hi. 21Bang hang hiam cih leh Khrih-a' ding bekin a nungta ka hi a, si ta leng zong kei-a' dingin hoihzaw semsem lai hi. 22Leitung pumpi nungta lai hi leng na a manpha tampi semthei ding ka hih manin, sihding leh hin'ding ka teelsawn ding ka thei kei hi. 23Hih thu nih khentat hak ka sa mahmah hi. Kei-a' dingin hoihzaw thampek ahih manin leitung pumpi si-in Khrih tawh omkhawm ding ka ut hi. 24Ahi zongin note-a' dingin kei ka hin' lai ding kisam phazaw hi. 25Hih thu a hoihpen ding hi, ci-in theitel ka hih manin note' khan'tohna ding leh upna hangin na lungdamna uh a khangsak dingin note ka hong hin'pih lai ding hi. 26Tua ahih manin note kiangah ka hong hawhkik ciangin Jesuh Khrih tawh kipawlin na nuntakna uhah kei nong kisialhpihna ding uh thu tampi hong omlai ding hi.

27Note tawh a omkhawm dingin ka hong paithei a, ka hong paithei kei zongin note in lungdamna thu tawh kipawl upna thu-ah ngimna kikhatin kiptakin na omna ding uh leh deihna kikhatin na dokhawmna thu uh ka zak theihna dingin Khrih hanga lungdamna thu tawh a kilawm a kituakin na nuntak ding uh a thupi pen ahi hi. 28Note a hong gualzosak dingpa pen Pasian ahih manin na galte uh na kihta kei un. Hangtakin om tawntung le uh cin, note a gualzo ding hi-in, na galte uh a guallel ding ahihna thu, na galte un hong thei ding hi. 29Bang hang hiam cih leh Khrih' na sepna ding hunpha zong note tungah a hong kipia hi a, Khrih upna tawh ama na a sem hi bek loin, thuakna tawh zong a sem ding na hi uh hi. 30Tua ahih ciangin tu-in note in na hong muh uh ka galdona leh tu mahmahin ka do lailai na zak uh thute-ah kei na hong dopih thei ding uh hi.