Thupatna

Ezra Laibu in Khang Tangthu Laibute sunga om thute zomto ahih manin Babylon gam panin Judah mi pawlkhat a ciahkikna thu leh Jerusalem khua-ah nuntakna leh biakna a ngei bangin a kipatkikna thu na gen hi. A thupiangte a nuai-a bangin a zomzomin na kigen hi.

1. Persia gambup a uk kumpipa Sairas thupiakna tawh salin a om Judah mi a ciah masa pawlkhat, Babylon khua panin a din'khiatna.

2. Biakinn kilampha kikin ki-ap a, Jerusalem khua-ah Pasian biakna a ngei bangin a kipatphat kikna.

3. Tua zawh kum tampi khit ciangin Israel minamte' luahsa kha tawh kisai thute a letkip theihna dingun a biakna nuntakna uh leh a leitung nuntakna uh a vaihawm phatkiksak, Pasian' thukham a siam mahmah Ezra' makaihna tawh Judah mi pawlkhat, Jerusalem-ah a ciah leuleuna thu ahi hi.

Tom Lakna
Salsuahna pan a ciah masa pawl    1:1—2:70
Biakinn lamkikin ki-ap    3:1—6:22
Sal pawlkhat tawh Ezra a ciahna    7:1—10:44

Ezra 1

 

Sairas' Taangkona

(2 Khang Tangthu 36:22-23)

1Persia kumpi Sairas' uk kum khatna kumin, Jeremiah tung tawnin Topa' thugen a tun' theihna dingin, ama gamsung khempeuhah taangkona khat bawlin lai-in zong a gelhna dingin Persia kumpi Sairas' lungsimah Topa in a suaksak hi. Amah in hih bangin a hih hi: * 2“Persia kumpi Sairas in hih bangin ci hi: Vantung Pasian, Topa in leitung kumpi gam khempeuh keima tungah hong pia khin a, Judah gamsung Jerusalem khua-ah ama-a' dingin biakinn khat ka lamsak ding hong sawl hi. * 3Note lakah ama mi peuhmah a Pasian in ompih hen la, Judah gamsung Jerusalem khua-ah paito hen la, Israel Pasian, Topa' biakinn lamkik hen. Amah pen Jerusalem-ah a om Pasian ahi hi. 4Tua ciangin koilai mun koilai gama om hita leh Judah mi a omlai khempeuh, ama omna mun mite in Jerusalem-a om Pasian' biakinn-a dingin utthu-a a piakte uh banah, ngun leh kham, nate leh ganhingte tawh zong huh ciat uh hen,”
a ci hi.

Jerusalem-ah Salte A Ciahkikna

5Tua ciangin Judah leh Benjamin sunga innkuan lutangte, leh siampite leh Levi mite, Jerusalem khua-a om Topa' biakinn a lamkik dingin a lungsim sung uhah Pasian in a suahsak mite khempeuh kithawi uh hi. 6Tua ciangin a veng a pamte in thatang tawh a huh uh banah ngun tawh kibawl umlebeel, kham, van tuamtuamte, ganhingte, leh letsong manphate tawh huh thuah lai uh hi. 7Tua thamloin, Nebukhadnezzar in Jerusalem panin puakhia-in ama pasian-te' biakinn sungah a koihsa ahi Topa' biakinn-a om ngei umlebeelte zong kumpipa Sairas in pusuah hi. 8Persia kumpi Sairas in hihte pusuahin sumkempa Mithredath' khutsungah ap hi. Tuapa in Judah ukpa Sheshbazzar-a' dingin a malzah simin sazian bawlsak hi. 9Tua nate a phazah: Kham kuang tul khat, ngun kuang tul khat, umlebeel a nam tuamtuam sawmnihlekua, 10kham kuang-uk sawmthum, ngun kuang-uk a nam tuamtuam za li sawm khat, leh umlebeel adang tul khat ahi hi.

11Kham leh ngun kibawl umlebeelte khempeuh a vekpi-in tul nga za li sawmgukkua pha hi. Tua hi a, Babylon panin salte a kiciahpih kik ciangin Sheshbazzar in tua nate khempeuh Jerusalem-ah a ciahpih hi.