Thupatna

Esther Laibu sungah a kigelh thupiangte pen Persia gambup a uk kumpipa' phalbi inn-ah a piang thu ahi hi. A gen bulpi pen in a lungsim hang Jew numei Esther a kici numei khat thu ahi hi. Tua numei in a mite a itna leh a lungsim han'na hangin a galte un a thahmang khitna ding panin a mipihte a suahtak hi. Hih sungah Jew mite' Purim Pawipi a kipatna zia leh a khiatnate a kigen hi.

Tom Lakna
Esther, kumpinu suak    1:1—2:23
Haman in Jew mite a thahsawmna    3:1—5:14
Haman a kithahna    6:1—7:10
Jew mite in a galte uh a zawhna    8:1—10:3
 

Esther 1

 

Kumpinu Vashti in Kumpipa Ahasueras' thu Nial

1Hih lai-a kigelh thupiangte pen India gam panin Ethiopia gam dong, gamneu za khat sawmnihsagih a uk Ahasueras' hun lai-a piang thu ahi hi. * 2Hih hun laitakin kumpi khua ahi Susa khuapi sunga kumpi tokhom tungah amah tu hi. 3Ama uk a kum thumna kumin ama nuai-a a uliante khempeuh leh a nasemte-a' dingin pawi khat bawlsak hi. Ama khutnuai-a om Persia leh Media galkapmangte leh ama nuai-a uliante leh ama nuai-ah gam a uksawnte a om laitakin, 4a kumpi gam hauhna leh ama thupi ziazuana ni tampi sung, ni za leh ni sawmgiat sung tak a lak hi.

5Hih pawi hun a bei khit ciangin kumpi khua Susa khuapi sunga om milian mineu mi khempeuh-a' dingin kumpipa in pawi khat a bawl hi. Tua pawi pen kumpi inn huang sungah kibawl a, ni sagih sung kibawl hi. 6Tua huang sungah suangkang khuamte kiphut a, khau malneu leh khau dupsan tawh ngun kualte-ah kikhihin a kikhai dalna puanpakte kikhungin, suangmanpha a san, a dum, a kang, leh a vom, a nam tuamtuamte kizangin a kizem suangphah kiphah tungah kham leh ngun kibawl lupnate kikoih hi. 7Kham hai nam tuamtuamte tawh zu kihawm a, kumpipa' hauhna tawh kituakin deihdeihin zu kizang hi. 8Tua lai-ah zu nekna zia pen kihah piak cih omlo hi; bang hang hiam cih leh mi khempeuh in amau' duh zahzah bek a neksakna ding uh kumpipa in a nuai-a a uliante thu pia hi. 9Tua banah Kumpinu Vashti in zong numeite-a' dingin Kumpipa Ahasueras' innsung mahah pawi khat a bawl hi.

10-11A ni sagih ni, zunekna hangin a lung a nop ciangin kumpipa in ama na a sem innsungmang sagihte Mehuman, Biztha, Harbona, Bigtha, Abagtha, Zethar, leh Karkas-te sam a, mite leh uliante mai-ah Kumpinu Vashti a melhoihna a lahtheihna dingin a kumpi lukhu khusa-in ama kiangah a paipihna dingun a sawl hi; bang hang hiam cih leh tuanu a mel a hoih takpi mah ahi hi. 12Ahih hangin Kumpinu Vashti in innsungmangte' thupuak kumpipa' sapna a nial hi. Hih a nialna thu-ah kumpipa heh mahmah a, a hehna hangin a sin so hi.

13Tua ciangin kumpipa in upadi siam a mipilte thu dong hi. Bang hang hiam cih leh upadi leh biakna lam thutheite khempeuh thu dot pen kumpipa' zat ngei khat ahi hi. 14Ama gei nai penah a tu mite pen Persia leh Media gam ulian sagihte ahi Karshena, Shethar, Admatha, Tarshish, Meres, Marsena, leh Memukan-te hi uh a, kumpipa kiangah a hawh thei, kumpi gamsungah ulian pente ahi uh hi. 15“Innsungmangte' tung tawnin keimah kumpi Ahasueras' thupiakna bangin Kumpinu Vashti gamtalo ahih manin Kumpinu Vashti tungah upadi tawh kizui-in bangci kihih ding ahi hiam?” a ci hi.

16Tua ciangin kumpipa leh uliante' zakin Memukan in dawng a, “Kumpinu Vashti khial hi; kumpipa tung bek hiloin Kumpipa Ahasueras' ukna gamsung khempeuha om uliante leh mi khempeuh tungah zong a khial ahi hi. 17Kumpinu' gamtatna thu numei dangte khempeuh in thei ding uh a, hih thu hangin numeite in a pasalte uh simmawh ding uh a, amaute in, ‘Kumpipa Ahasueras in ama kiangah a pai dingin Kumpinu Vashti thu pia napi-in pailo hi,’ ci ding uh hi. 18Hih banga kumpinu' gamtatna thu a za Persia leh Media gam numei liante in kumpipa nuai-a uliante tungah tuni mahmahin hih thu gen ding uh a, kisimmawhna leh kizahtak lohna tampi piangsak ding hi. 19Kumpipa in hoih na sak leh, kumpi thupiakna khat paisak in la, Kumpipa Ahasueras' mai-ah Vashti a kilakkik nawnlohna dingin a kikhelkik ngei nawnlo ding Persia mite leh Media mite' upadi sungah gelhsak in. Tua ciangin amah sangin a kilawmzaw numei khat ama za luahsak in. 20Tua banga kumpipa' thupiakna thu kumpi gamsung khempeuhah a kizak ciangin numei khempeuh in a neu a lian amau' pasal ciat zahtak ding uh hi,” a ci hi.

21Kumpipa leh uliante in hih ngaihsutna hoihsa uh a, Memukan' gen bangin kumpipa a gamta hi. 22Pasal khempeuh pen ama innsung ukpa ahihna ding leh ama kampau a kizuih kimna dingin kumpipa' ukna gam khempeuhah amau' lai ciat, leh mi khempeuh tungah amau' pau ciatin laikhakte kigelh hi.